عانس ولكن!
انا بنت عمري ٣٣ سنة بعمرو بحياتو ما حدا اتقدملي مع اني مثقفة جامعية حلوة بشهادة الجميع بس سبحان الله ما حدا عمرو فكر فيني حتى ايام الجامعة كنت شوف كتير زملاء يبدو اعجابهم فيني لكن ما عمرو حدا اجا حكاني من ضمن هالزملاء كان في شب اكبر مني بسنتين كان كتير يلاحقني ويضل بس نظرات حتى صاحباتي يحكولي كتير نظراتو عليكي لكن انا لا حول الي ولا قوة وخجولة كتير ما بقدر اقرب عشب او احكي حد واحكي بقلبي اذا نيتو شريفة بيتقدملي وما بنكر انا قلبي حب هالشب يعني صرت احب نظراتو واليوم اللي ما اشوفو فيه يتعكر مزاجي كل هاد بس نظرات وعن بعد والله بيشهد عليي بعمري ما حكيتو ولا حتى عبرت عن اللي جواتي لشي حدا واتخرج وصار كل فترة يزور الجامعة ودريت انو اتوظف وانا بعد سنتين من تخرجو اتخرجت ومع الاسف قعدت بالبيت قدمت ع وظيفة بس ما اتوظفت وبقيت زيي زي هالعالم استنى نصيبي والحمد لله عكل حال ما حدا اتقدملي اطلع عمناسبات وانزل مع صاحباتي اللي يشوفني يعبر عن اعجابو ويروح يعني من ضمن هالمواقف وحدة شافتني بكفيتريا سالتني عن حالي وانها بتخطب لابنها اخدت عنوان اهلي وما رجعت بالرغم عيلتي منيحة اخواتي كلهم متزوجين وسمعتنا زي المسك بس خلص ربنا هيك رايد بقيت ١٠ سنين بلا وظيفة وبالاخر اتوظفت معلمة بمدرسة حكومية والحمد لله
بيوم بلاقي رسالة بتيجيني عالفيس كيفك شو اخبارك بالاول استغربت مين هاللي بيبعت لما رديت لقيتو احمد اه الشب اللي كانت نظراتو ملاحقاني وين ما اروح رديت اهلين كيفك يعني كلام عادي
بسال عني وشو صار فيي وهيك
انا لاول مرة بحياتي بحكي مع شب فجاة انا بحكيلو شو بقدر افيدك ؟ وليش تبعتلي وتحكي معي كانك عارفني من سنين برغم بعمرنا ما كان بينا كلام بلش يحكيلي اتزوجت بعد ما اتوظفت وعندي ولد وبنت انا هون متل اللي صحيت من كابوس قلتلو وشو المطلوب انا لهلاء ما بعرف ليش بتبعتلي وشو فكرك فيني فبيحكيلي انا شفتك بدورة المعلمين وكنت معكم بالدورة وشكلك متل ما انتي ما اتغيرتي فحبيت احكي معك
اتشكرتو وسكرت الحديث معو بتفاجا تاني يوم بيبعتلي ما رديت انا قلبي حزين يا جماعة انا قدامك كنت وبالحلال ما اخدتني هلاء جاي تغير جو معي؟ ليش عشان صار عمري ٣٣ فاضية محدش معبرني اه احنا هيك مجتمعنا بفكر البنت ازا صارت فوق٢٥ خلص ما بتلزم فما بالك صارت ٣٣ ؟ انا حزنت عنفسي وعحالي وعالدنيا المرا اللي اخدتها واعطتك جسمها وقلبها وحياتها شو ذنبها لتذمها وتحكي عنها غلطة واستعجلت اللي جابتلك ولد وبنت وقايمة فيك شو ذنبها تعمل فيها هيك هلاء شفتني هلاء عرفت توصلي انا بنت اشي طبيعي احافظ عحالي ما عندي اطفال يهلكو جسمي ما عندي مسؤولية وهم افكر فيها تحكيش انتي متل ما انتي لتستدرجني احنا البنات ربنا ما قسملنا نتجوز لحكمة مش عشان نكون خراب بيوت ناس ومش عشان نكون تسلاية حزت بنفسي وانا بحكي لرفيقة عمري اللي صار وهيي بترد عليي اتجوزيه واكسبيلك ولد مهي راحت عليكي لا يا مجتمعي العزيز راحتي ما ببنيها عحساب وحدة مالها ذنب
يا بنات لا تصدقو الكلام اللي بدو التاني بياخدو من البداية لا تخربو بيوت ناس ملهاش ذنب وانتي يا زوجة يا صالحة لا تصدقي كلام حبيب قديم انو مشتقلك لو بالاساس فيه خير كان ربنا سخرو ويسر امرو من البداية
مش كل بنت ما كتبلها ربنا تتزوج عند اول فرصة تصحلها تروحها احنا بشر وربنا اختارلنا مش احنا اللي اخترنا هالشي
تعليقات
إرسال تعليق