أثر وسائل التواصل الإجتماعي على الصحة العقلية

 يومي يكون مختلف بحديثي المستمر مع الصغير المُحاور سليمان

هذا الكائن ضئيل الحجم ،صغير العُمر ،عبارة عن مجتمع مستقل بذاته ،بسم الله ما شاء الله ،متحدث ومبتكر ،وبشكل مستمر أنا في ورطة معه ..

ذات يوم وجدته في الساحة يتحدث مع بنوتة صغيرة (ابنة زميلتنا) 

_ سليمان ليش طالع من صفك؟

-- عشان أشرب ميه

_ بس انا مش شايفاك بتشرب ميه !

-- لأ انا شربت وخلصت ،بس لقيت البنت هذه واقفة لحالها قلت أشوف مالها .

_ طيب هات ايدك وتعال أوديك ع صفك .

-- بديش توديني ع صفي ،بعرف أروح لحالي ،بس لو انتي شاطرة اسبقيني لحد صفي ،أنا أسرع منك أصلاً .

_ 🥺🙃

طبعاً سبقني وأعلن لكل الصف (انا سبقت المديرة ،وكانت بدها توقع)

_______________________________________

في يوم آخر🌹

-- صباح الخير يا مس مديرة 

_ صباح الخير ،يا هلا ،نعم؟

-- اسمعي انا الوضع هيك مش عاجبني بالمرة ،عاجبك اللي بيصير؟

_ أهدأ وفهمني ،الدنيا الصبح ..

-- المس رشا غايبة ،ورسيل بتضل تغلب المس إسرار (إسراء) ،بدنا نعرف نفهم الشرح ،بدنا نركز ،بعدين كل الصفوف بيصيروا أشطر منا . شوفيلنا حل 😡

_ 😳 طيب أنا عندي شغل عشر دقايق وجاية اشوف الموضوع .

( ونسيت الموضوع ،وما رحت لسليمان باشا )

ثاني يوم اجا معصب 

-- صح إنتي قلتي بدك تيجي تشوفي رسيل ليش ما اجيتي😡

_ نسيت ياسليمان نسيت ،ومش عارفة شو اعمل معها ،انت شو رأيك؟

-- صح إنتي المديرة ؟

_ صح 

-- عاقبيها ، اقلك افصليها وخلاص

_ وحد الله يا شيخ سليمان مش هيك 

____________________________________

وفي ورطة أخرى 🌹

-- صباح الخير يا مس مديرة 

_ صباح الخير 

-- بدي احكي معاكي في موضوع 

_ تفضل 

-- انتي ليش بتسمعيش النا ،احنا احفظنا كل اللي اعطتنا اياه المس رشا،وانتي بتسمعي لتمهيدي واحنا لأ ،كله كله احفظناه ،سمعيلنا 😡

_ حاضر من عيوني 

-- شكراً ،بس يا رب ما تنسي 😛

_ 😳🙃

بعد كم يوم كان عنا ضيوف وطلع صف سليمان ع الساحة ،فبدون تردد اجا يحكي معي

-- انتي لا حليتي مشكلة رسيل😡 ،ولا سمعتيلنا😡

_ لأ انا بديت اسمع للبستان بس لسة ما وصلك الدور

-- طيب سمعيلي انا حافظ

_ طيب بعدين يا سليمان عشان عنا ناس ،والمدير موجود بعدين يا سليمان بعدين الله يهديك

-- هذا المدير؟

_ آه

راح لمديري وقدم فيا شكوى

-- عمو عمو 

_ نعم يا عمو

-- المديرة مش راضية تسمع لصفنا واحنا حافظين .

_ شو حافظ 

-- حافظ سورة الأعلى و كل اشي كل اشي حافظ ،خليها تسمع النا

سمعيلهم  يا ميساء واعطيهم جوائز كمان ،ما تورطينا لو سمحتي .

______________________

ما أريد أن أوصله من بعض مواقف  هذا الطفل الجميل ❤️ حفظه الله و البالغ من العمر أربع سنوات فقط ،أنه قادر على التعبير والمناقشة ،وابداء الرأي ،وانتزاع حقه ،لأنه نشأ في بيئة تتيح له ذلك ،خلقت لديه شخصية مستقلة وقادرة على خدمة المجتمع مستقبلاً .

النقطة الثانية التي أود تسليط الضوء عليها هنا ،ان هذا الجيل متهم دائماً بأنه مشاغب ،مشاكس ،فاشل ،اتكالي ،ولا أظن أن هذا صحيح ،فقد أنشأهم الله بهذه الصفات المختلفة عن الأجيال التي سبقتهم ،ليكونوا جاهزين للتعامل مع مستقبلهم المختلف تماماً عن واقعنا الحالي ،كل ما نراه في هذا الجيل من عيوب سنكتشف يوماً ما أنها كانت مميزات ،وواثقة جداً بنجاحهم في بناء المستقبل ، وقدرتهم على مواجهة كل التحديات والصعوبات 🙂